LA UNION – Naka-relax mode ita ni Atty. John Lester Balagot kalpasan a maysa kadagiti nagasat a pimmasa iti napalabas a bar examination idi November 2019.
Iti ekslusibo a pannakiuman ti Bombo Radyo La Union kenni Atty. Balagot, kinuna na a saan na nga inarapaap iti agbalin nga abogado, agsipudta pulis iti kayat na koma a pagbalinan, ngem inaklon na a bimmagsak daytoy iti medical idi nag-apply iti PNPA.
Ngem ita kunana ket ‘sulit’ wenno nasubbot na iti amin a rig-rigat na iti uppat a tawen a panagadal na iti kina-abogasya, a nagustuanan na met laeng idi agbayag.
Aminado ni Atty. Balagot a narigat a kurso iti law, ngem iti lima a bulan a panag-review na idiay Manila, kinuna na a saan na unay nga im-pressure iti bagi na.
Inaldaw pay kunana nga agturong iti library, manipud bigat agingga iti rabii tapno agbasa ken i-master dagiti basics iti kurso daytoy.
Iti 25-anyos a ni Atty. Balagot ket nagturpos nga immuna ti Crimology iti Saint Louis College ditoy La Union sakbay a nangala ken nagturpos ti kina-abogasya iti Saint Louis University idiay Baguio City idi 2019.
Maysa kadagiti option ni Atty. Balagot ket makapagserbi iti gobyerno, iti opisina ti Public Attorney’s Office (PAO).
Bugbugtong isuna nga anak ni PCpt. Eugenio Balagot a naka-assign iti Provincial Administrative and Resource Management Unit (PARMU) iti La Union Police Provincial Office (LUPPO), ken residente dagitoy idiay Aringay, La Union.
