LA UNION – Adda iti pakabuklan a 25 private schools iti intero a Rehiyon Uno iti napilitan nga agrikep ita nga School Year 2020-2021 kalpasan a maapektaran iti COVID 19 pandemic.
Daytoy iti kinumpirma iti Bombo Radyo La Union ni Deped Region 1 Public Affairs Unit Head ken Spokesperson Cesar Bucsit.
Kabilang iti listaan ti DEPED REGION 1 ket iti:
- PANGASINAN – 16
- LA UNION – 6
- ILOCOS NORTE – 2
- ILOCOS SUR – 1
Adu iti makagapo a dinakamat ni Bucsit nu apay a napilitan nga agrikep dagiti nasao a pagadalan.
Kabilang ditoy iti nababa a bilang iti enrollees, problema iti panangipatungpal ti naduma-duma a learning modalities, dekalidad ti edukasyon, dagiti restrictions nga ipatpatungpal ti IATF, ken kangrunaan ti amin, iti panagbalin a financial insufficient dagiti nasao a pagadalan gapu iti nababa nga enrollment rate.
Malaksid dayta, maikonsidera pay iti pagimbagan wenno seguridad ti salun-at dagiti agad-adal kontra iti makapatay a sakit a COVID 19.
Innayon pay ni Bucsit nga iti agdama, agtultuloy iti ar-aramiden a panagsagana ti Deped Region 1 para iti umadanin a panaglukat ti klase iti pampubliko nga eskuwelaan inton Oktubre 5,2020.
