Inallukoy ti Philippine National Police (PNP) iti akinkukua iti pet crematorium sadiay Bacoor City, Cavite a makitinnulong iti imbestigasion mainaig iti pannakaibelleng dagiti bangkay ti 29 nga aso ken pusa sadiay San Jose del Monte, Bulacan.
Segun kenni PNP spokesperson Police Colonel Allen Rae Co, agarup 250 a pet owners ti nangipila iti reklamo gapu ta saan a na-cremate dagiti bangkay dagiti tarakenda.
Impaganetget ni Co a rumbeng a mangidatag ti owner ti panangilawlawag kadagiti imbestigador, iti laksid ti immun-una nan nga statement a saan a pudno dagiti alegasyon.
Adadalenen ti PNP Forensic Group sadiay Cavite dagiti dapo a naisubmitir kadagiti pulis tapno maammuan no pudno a naggapu dagitoy kadagiti nasao nga ayup.
Kabayatanna, imbestigaran met dagiti otoridad dagiti report ti dadduma pay a bangkay ti ayup a nasarakan iti nagduduma a lugar iti Bulacan.
