LA UNION – Aminado iti hepe ti San Fernando City Police Station a ni P/Supt. John Guiagui, nga agtultuloy iti panagraira dagiti drug personality, kaipapanan nga agtultuloy met iti panaglakwan ti iligal a droga ditoy lokalidad.
Nupay kasta, siniguro ni Col. Guiagui a lalo pay nga inirutan da iti kampanya kontra illegal drugs babaen iti napairutan nga intelligence gathering, koordinasyon iti BADAC, ken panangipatungpal iti police operations tapno maparmek dagiti agiwar-waras ken agus-usar ti droga.
Iti eksklusibo nga interview ti Bombo Radyo La Union kenni Col. Guiagui, kinumpirma na a dumanon iti 27 a drug pusher/users iti inarestar da iti uneg ti bulan ti Hulyo ditoy laeng syudad ti San Fernando.
Daytoy ket babaen iti impatungpal da a 15 a police operations a pakaibilangan iti 11 a buy bust ken 4 a police response.
Kinuna na pay a saan laeng a taga-syudad dagiti inarestar ti pulisiya, nudiket naggapo iti kabangibang a lugar ti San Fernando, kas koma iti ili ti San Juan, Bauang, ken Agoo, La Union.
Inlawlawag na pay a ti drug watchlist nga iggem ti BADAC ket ival-validate nga umuna ti pulisiya, sakbay a mangipatungpal dagitoy iti tokhang wenno police operation maikontra kadagiti identified drug personalities.
