LA UNION – Tengngel itan ti Aringay Police Station ti maysa a guard kalpasan a napapatayna ti kaduana a security guard idiay ili ti Aringay idi rabii.
Nabigbig ti suspek a ni Joy Balaoro, 30-anyos, bayat a ti biktima ket ni Rey Baldemor, addaan iti asawa, tubo ti Brgy. Namit-ingan, Dolores, Abra.
Maibasar iti inisial nga imbestigasion ti pulisia, timpuar ti saan a panagkinnaawatan iti nagbaetan dagiti dua iti bambantayanda a compund ti pamilia Sibuma idiay Brgy. San Eugenio idi kellaat lattan a pinaltogan ti suspek ni Baldemor.
Dagus met a nagresponde dagiti kameng ti Scene of the Crime of Operatives (SOCO)-Police Regional Office 1 iti nakapasamakan ti krimen bayat nga agtultuloy a dukduktalenda ti makagapu iti nagrikiaran dagiti dua.
