LA UNION – Balligi ni Norlyn Ann Reyes, 29 anyos, maysa a working mom manipud Mangaldan,Pangasinan kalpasan a nakapasa isuna ti March 2024 Licensure Examination for Teachers ken maysa kadagiti nagbalin a top six ti eksaminasion.
Nagturpos isuna ti kurso a Bachelor of Secondary Education, Major in Science, iti Don Mariano Marcos Memorial State University – South La Union Campus idiay Agoo La Union.
Iti pannakiuman ti Bombo Radyo La Union kenni Reyes inbingay na a personal choice na ti kurso nga innala na.
Immuna a nag-enroll kas English major ngem nagsardeng daytoy ti innem a tawen gaputi parikot iti biag ken naad-daan isuna ti anak.
Napadayawan pay isuna kas Best in Teaching Intership ken nakagun-od ti review scholarship nga isu ti inusar na bayat iti panagsagana ti eksaminasyon na.
Maysa laeng ni Norlyn kadagiti 71,429 a nakapasa manipud 130,744 a nangala ti eksaminasyon.
