LA UNION – Napadayawan dagiti tallo a pulis a kameng ti Bangar Police Station a nangisalbar ti biag iti maysa a menor de edad a gestay nalmes iti kabaybayan idiay Barangay Paratong 3, Bangar, La Union idi Agosto 7, 2021.
Impaayan ti Civil Service Commission (CSC) iti ‘Gantimpala Agad Award’ ken Medalya ng Kadakilaan ti PNP, ni Patrolman Heferson D. Otanes, a nangalaw iti malmalmes a 14-anyos a barito a ni Andrielo Valdez.
Immawat met ti ‘Medalya ng Papuri’ dagiti dua a kakadwa na pay a pulis a nagresponde iti kapada nga insidente nga isuda: Police Senior Master Sergeant Marlon P. Panitan ken Patrolman Jerick Dapuyen Pascua.
Naipaay dagiti nasao a pammadayaw kadagiti tallo a pulis idi Lunes, kabayatan ti naisayangkat a seremonya iti PRO1 Grandstand idiay Camp Florendo, Parian, City of San Fernando, La Union.
Iti programa ket dinar-ayan dagiti opisyal ti Regional ken Provincial Civil Service Commission iti panangidaulo ni PBGen Emmanuel Peralta, agdama a PRO1 Regional Director.
