LA UNION – Mangrugi inton bigat, Marso 15 agingga Abril 6, 2021 maipasidong iti “red zone” dagiti tallo a rehiyon idiay pagilian nga Italya.
Pakairamanan ditoy dagiti maaw-awagan a most populated regions nga Lombardy ken Lazio, agraman iti kapital a Rome ken financial centre ti Italy a Milan.
Iti eksklusibo a pannakiuman ti Bombo Radyo La Union kenni BINC Rhodora Villegas, iti pannakaipasidong iti “red zones” dagiti nasao a rehiyon ket gapwanan iti third wave ti COVID 19 wenno ngumatngato manen a bilang iti kaso ti COVID 19.
Iti red zone ti maibilang a maximum level of coronavirus restrictions idiay Italya wenno kaibatugan ti ECQ ditoy Pilipinas.
Sumarsaruno iti orange, yellow, ken white a maibilang a kalukayan a tiered system.
Kinuna ni Villegas a ti pannakaipasidong iti red zone dagiti nasao a lugar ket kaipapanan nga agrikep manen dagiti non-essential shops ken restaurants, pagadalan, limitado manen dagiti rumuar a tattao, kasapolan iti work requirements kadagiti rumuar ken uray dagiti mapan gumatang iti basic necessities.
Segun kenni Villegas, idi umuna a lawas ti Marso, nangrugi a naipatungpal iti baro a curfew, a 10:00pm to 5:00am.
Ngem inton Easter holiday manipud April 3 to 5, iti intero nga Italya ket maipasidong iti red zone wenno national lockdown tapno maliklikan iti panagwaras ti virus.
Kinuna na pay nga iti napalabas a dua nga aldaw, dimmanon iti nasurok 26,000 iti naipadamag a COVID-19 cases ken 380 dagiti natay gapwanan ti coronavirus.
Sipud timpuar ti pandemya, iti Italya ket nakailistan iti nasurok 3.1 million cases ken 101,564 death toll, isunga iti Italya ket maibilang a maikadwa a pagilian iti intero a Europa a nakailista iti nasurok 100,000 COVID 19 deaths.
Innayon pay ni Villegas nga idi pay bulan ti Enero a nangrugi ti vaccination program idiay Italya.
