LA UNION – Arestado iti tallo a senior citizens gaputi illegal a pallot wenno tupada idiay Brgy. Calautit, Bacnotan, La Union.
Base iti report manipud Bacnotan Police Station, dagiti naarestar ket pakaibilangan iti managan Domingo Bucala, 53-anyos, residente ti Brgy. Calautit; Roy Bueno, 65-anyos, residente ti Brgy. Nagsimbaanan; ken Eugenio Lagarteja, 72-anyos, residente ti Brgy. San Martin, ti nasao met laeng nga ili.
Kinumpiskar dagiti otoridad iti dua a papalluten a manok, uppat a tari, tallo a karton wenno chicken box, ken bet money nga umabot ti Php 700.00 iti naduma-duma a denominasyon.
Dagiti dadduma a bettors ket naglibas ngem nangisayangkat a dagus dagiti otoridad iti follow-up investigation.
Kabayatanna, kinumpirma ni Pol Major Cresencio Avila Jr. , OIC chief-of-police ti ili a Bacnotan, naipilan ti kaso a panaglabsing iti PD 449 (Cockfighting) as amended by PD 1602 (Illegal Gambling) kontra kadagiti suspek.
Nupay kasta, maysa kadagitoy iti nagbayad ti piyansa nga umabot ti P36,000 para iti temporaryo a pannakawaya-waya bayat a dagiti dua ket agtaltalinaed iti custodiya ti Bacnotan Police Station.
