LA UNION – Arestado iti tallo a tattao gaputi modus dagitoy a pananglim-limo ken panagkiddaw da ti kuwarta kadagiti biktima.
Dagiti suspek ket nabigbig iti nagan a Juaquin Santos, 52, addaan asawa; maysa nga 11-anyos ken out-of-school youth nga ubing; ken Mario Baun, 54, agpapada a taga Tarlac City, Tarlac.
Maysa a nabiktima ti grupo ni Santos a managan Leonila Supsup, 60-anyos, piggery owner ti Barangay Payocpoc Sur, Buang, La Union ket nagkamang iti Bauang Police Station kalpasan a naamiris na a nalim-limo daytoy.
Base iti salaysay ni Supsup, nagturong dagiti suspek iti balay na ket nagpabigbig ni Mr. Santos a kameng ti maysa a nalatak a radio station idiay Manila ken empleyado pay iti Provincial Sanitary ditoy probinsiya.
Kiniddawan ti suspek iti sanitary permit ti biktima ngem awan ti maipakita daytoy.
Gaputi dayta, dinawatan ti suspek iti biktima iti kantidad a P1,860 para iti maipagarop a pannakai-proseso iti sanitary permit daytoy
Ngem naka-amiris ni Supsup isunga nagreport idiay Bauang Police Station.
Malaksid kenni Supsup, dua pay a nabiktima ti grupo ni Santos, iti nagreklamo iti pulisiya.
Dagus met a nagtignay dagiti otoridad babaen iti pannaki-koordinar da iti dadduma a police station.
Kas resulta, nakemmeg dagiti suspek idiay Barangay Damortis, Sto. Tomas, La Union.
Inaklon dagiti suspek a nabayagen iti modus da ken nakapagturong dan iti dadduma nga ili ditoy probinsiya ken uray idiay Pangasinan.
Maipalagip a maysa kadagiti suspek a pukol ti saka na ken naka-wheelchair ket naminsanen nga inusar na iti nagan ti Bombo Radyo tapno makadawat ti kuwarta kadagiti biktima.
Naamwan pay a sumagmamano metten a daras a tiniliw dagiti otoridad ken naibalud gaputi kaso daytoy.
Iti agdama, kaso nga estafa through extortion iti sangsangwen dagiti suspek.
