LA UNION – Naipilan idiay piskalya ti kaso kontra kadagiti tallo a lallaki a naaresto babaen ti naisayangkat nga anti-illegal drug operation dagiti operatiba kadagiti tallo a lugar ti La Union.
Natiliw ti maipagarup a drug pusher a nabigbig iti nagan a George Calaonan, 49, residente ti Barangay Bumbuneg, San Gabriel gapu iti buy bust operation ti pulisya.
Nakompiskar manipud iti ikot ni Calaonan iti maysa a sachet a naglaon iti maatap a marijuana ken ti naaramat a buy bust money.
Maysa a sachet a naglaon iti maatap a marijuana ti nakompiskar dagiti otoridad manipud ikot ti suspek a ni Joemar Gaerlan, 23, residente iti Barangay Nagirangan, San Juan.
Ni Gaerlan ket naaresto idiay Barangay Poblacion, ili ti San Gabriel gapu iti ikotna a maatap a marijuana.
Idiay Barangay Santiago Sur, Caba, arestado met ti agnagan Dionisio Bacalso gapu iti maipagarup a panaglako na ti maatap a marijuana.
Kaso a panaglabsing iti Comprehensive Dangarous Drugs Act ti reklamo a sangsanguen dagiti nadakamat a suspek.
