LA UNION – Tallo a babbai iti inarestar dagiti otoridad idiay San Juan, La Uniuon gaputi panagusar iti peke a kuwarta.
Maibasar iti report ti pulisiya, dagiti suspek ket nabigbig nga isuda Noraiza Abraham, 28; Baynun Angcop,36 ; ken Anna Magi, 31, agpapada nga awanen ti asawa ken residente ti Taguig City.
Maibasar pay iti police report, natiliw dagiti tallo kalpasan a naduktalan a peke iti P200 bill nga ibayad koma ni Abraham iti gimmatangan na iti mani ken diposable paper plate.
Ginandat pay dagiti dua a kakadwa ni Abraham nga aglibas ngem natiliw met laeng dagiti otoridad iti national highway idiay Ili Sur, San Juan, La Union.
Nakumpiskar manipud kadagiti suspek iti 10 a pidaso ti peke a P500 peso bill ken 14 a pidaso ti P200 bill.
Dagiti suspek ket naipasidong iti custodiya ti San Juan Police kabilang dagiti nakumpiskar a bogus a kuwarta para iti umno a disposisyon .
