LA UNION – Plano ti gobyerno ti Jordan nga ipatungpal ti tallo-aldaw a total lockdown inton agleppas ti Ramadan, May 24.
Daytoy ti kinuna iti Bombo Radyo La Union iti maysa nga OFW idiay Amman, Jordan a ni Emily Villanueva a tubo ti San Juan, La Union.
Segun kenni Villanueva, posible nga aramiden daytoy iti gobyerno ti Jordan tapno maliklikan ti panagu-ummong dagiti muslim inton Eid al-Fitr, kas panang-protektar kadagiti umili na kontra iti sakit a COVID 19.
Maipalagip nga immirut ti gobyerno ti Jordan iti panangipatungpal dagiti annuruten iti pannakaipasidong da iti lockdown kalpasan a nailista ti nagsasaruno a panagngato ti kaso ti COVID 19 sadiay.
Kabayatanna, manamnama nga agleppas ti Ramadan wenno makabulan a fasting dagiti muslim inton Mayo 24, nga isu met iti aw-awagan da nga Eid’l Fitr.
Maysa daytoy a kapatgan a selebrasyon kadagiti muslim iti intero a lubong agsipudta mangisim-simbolo daytoy iti pammati ken panagyaman da kenni Allah.
