LA UNION – Inadatagen ti Philippine Drug Enforcement Agency (PDEA) – Regional Office 1 iti piskalya ti kaso a panaglabsing ti Comprehensive on Dangerous Drugs Act kontra kadagiti high value target (HVT) drug personalities a nataliwan nga aglaklako iti marijuana idiay Barangay Lucao, syudad ti Dagupan, Pangasinan.
Nabigbig dagiti suspek nga isuda James Manaoat, 24-anyos, residente ti Barangay Lasip Chico ti syudad; Maja Demah Bajunaid, 27, ken Jones Alexan Villamor 28, agpada nga agnanaed idiay Bimmaley ti nasao a probinsya.
Iti pannakiuman ti Bombo Radyo kenni PDEA-Regional Office 1 information officer Bismark Bengwayan, kinunana a nga umabot iti P100,000 ti balor ti marijuana iti nakompiskar manipud kadagiti suspek.
Malaksid kadagiti droga ket naala met manipud kadagiti suspek ti inaramatda a kotse, buy bust money ken dadduma pay nga ebidensya kontra kadagitoy.
Posible kinunana a nagtaud ti marijuana kadagiti rehiyon ti Ilocos ken Cordillera nga i-deliver koma dagiti suspek iti nasao a syudad ken uray idiay Manila wenno Cavite.
Iti agdama, dukduktalen pay ti PDEA ti kakaddua ti nasao a grupo.
Kabayatanna, sigun met kenni Atty. Allan Ancheta, hepe ti Legal and Prosecution Section ti PDEA-Regional Office 1, agpapata a naglabsing dagiti suspek ti Sec. 5 ken Sec. 11 ti Art. II iti Republic Act 9165.
Karaman iti HVT dagiti suspek gapu ta umabot iti nasurok a maysa a kilo a marijuana ti nakompiskar manipud iti ikotda.
