BR LA UNION – Kinumpirma ni National Bureau of Investigation (NBI) Officer-in-Charge Atty. Angelito “Lito” Magno a naki-koordinaren iti embahada ti Pilipinas tapno sumuko ti tallo nga indibidwal a maak-akusaran a karaman iti anomalya dagiti flood control projects.
Segun iti NBI chief, naggapo ti nasao nga impormasyon manipud mismo kenni Department of the Interior and Local Government (DILG) Secretary Jonvic Remulla.
Kinuna na nga addan ti surrender feelers manipud kadagiti nasao nga indibidwal nga adda pay laeng iti ballasiw taaw.
Kinuna met ti NBI chief a dagiti at-large nga indibidwal nga adda itiruar ti pagilian ket mabalin da a boluntaryo nga agawid ditoy pagilian.
Kinuna na a maki-koordinar da laeng ken masukon dagitoy iti airport wenno agpatulod ti gobyerno ti law enforcements a mabalin a mangsukon kadakuada.
Kabayatanna, agtultuloy iti monitoring ti NBI iti garaw ni sigud nga Ako Bicol Party list Representative Zaldy Co a naudi a nakita idiay Japan.
Impadamag pay ti opisyal ti pannakaiserbi ti arrest warrant kenni Co iti balay na, ket nakita dagiti vault, maleta ken karton, ngem inlawlawag ni Magno a saan da a sinukimat dagitoy gaputi kaawan ti search warrant.
