LA UNION – Nakabaluden ita dagiti tallo manipud iti innem a suspek a maipagarup a nangpapatay ti 3rd year marine engineering student iti Northern Philippines College for Maritime Science and Technology idiay syudad ti San Fernando, La Union.
Naammuan ti Bombo Radyo manipud iti La Union Police Provincial Office (LUPPO), gapu iti tulong ti Criminal Investigation and Detection Group (CIDG) Regional Office-1 ken babaen iti bileg ti warrant of arrest nga inyatnag ni San Fernando City, La Union Regional Trial Court (RTC) Branch 33 Judge Alpino Florendo ket naaresto da Braylle Lopez, Bryan Garcia ken Rommel Cagua idiay Barangay Nagsabaran Norte, ili ti Balaoan iti nasao a probinysa.
Dagiti tallo a nadakamat ken agpapada nga agad-adal iti nasao nga eskwelaan ken sumangsangoda ti kaso a murder gapu iti pannakairaman dagitoy iti napasamak a pammugbog agingga a napapatayda ti 18-anyos a biktima a ni Jerome Lopez.
An-anupen metten dagiti pannakabagi ti linteg iti dadduma pay a suspek iti nasao a krimen.
Maipalagip, napasamak iti pammapatay ti marine engineering student iti uneg ti maysa a karenderya iti sango ti pagadalan idi August 2014.
Maipagarup nga inrupir laeng ti biktima ti gayyemna a babai manipud ti panangbastos dagiti nabartek a suspek.
Ginadat met ti biktima iti lumiklik manipud ti riribok ngem sinurot pay daytoy dagiti suspek kasaruno iti pammugbog a nagbanag iti pannakatay daytoy.
