LA UNION – Nakaawiden kadagiti bukodda a pagtaengan dagiti tallo a mangngalap a dua nga aldaw a na-stranded idiay paset ti Ligayen Gulf kalpasan a pimmalya ti makina ti bilogda.
Nabigbig dagiti nadakamat a mangngalap nga isuda Yolanda Camba, Federico Rosal, ken Reynante Dedios, agpapada nga agindeg idiay Bolinao, Pangasinan.
Iti pannakiuman ti Bombo Radyo kenni Yolanda, kinunana a saanda pay unay a nakaadayo manipud iti igid ti baybay idiay Bolinao ket killaat a nagsardeng a nagandar ti makina ti luganda.
Binaybay-anda laengen nga inyanod iti dadakkel a dalluyon ti bilogda agingga a maisar-ong dagitoy idiay kabaybayan ti syudad ti San Fernando, La Union kasaruno iti panangarayat kadakuada iti padada a mangngalap.
Naistorya pay ni Yolanda nga inanusanda a kanen ti balonda a nabangles nga innapoy ken sumagmamano a pidaso a tinapay tapno saanda a mabisinan kabayatan nga agur-uray iti mangarayat kadakuada.
Agyamyaman met dagiti tallo iti padada a mangngalap a saan a nagpangngaddua a mangisalakan ken nangsangaili kadakuada agingga a makaawid dagitoy.
Intulod met dagiti kameng ti Philippine Coast Guard nga agturong idiay Bolinao dagiti nadakamat a naisalakan a mangngalap.
