LA UNION – Sumangsango ita iti kaso a frustrated murder dagiti suspek a maipagarup a nangparnuay ti riribok ken nagpaputok pay iti paltog iti maysa a tarsena idiay Barangay Butubot West, ili ti Balaoan, La Union.
Nabigbig dagiti suspek nga isuda Michael John Ancheta, 28; Jerome Valdez, 26; ken ti maysa a saanen a nainaganan a menor de edad.
Naammuan ti Bombo Radyo manipud iti Balaoan Police, nagturong idiay tarsena a kukua ti biktima a ni Analyn Camat dagiti suspek ken gimmatang dagitoy iti inumenda nga arak.
Maipagarup nga immuna a nagbangungga ni Ancheta ken nangiper-ak ti bote iti sango ni Camat.
Idi nga anawaen iti kakabagyan ti biktima ni Ancheta ket maipagarup nga immasot daytoy iti paltog kasaruno ti panangpaputok kadakuada.
Nagasat dagiti agkakabagyan gapu ta nakalinged dagitoy idi a nagpaputok ni Ancheta.
Sakbay a pimmanaw dagiti suspek ket maipagarup a nagbarsakda pay iti bote idiay tarsena.
Natiliw met dagiti tallo idi a nagresponde dagiti pulis iti nasao a barangay.
Narekobre idiay tarsena iti basyo ti bala iti cal .9mm, ngem napaay dagiti otoridad a makompiskar ti paltog a maipagarup nga inaramat ni Ancheta.
Kabayatanna, adda ita ti saldaw iti Department of Social Welfare and Development ti menor de edad a suspek.
