LA UNION – Inaresto iti pulisya dagiti tallo a nabartek a lallaki a maipagarup a nangparnuay ti riribok iti sango ti maysa a bar idiay Barangay Madayegdeg, syudad ti San Fernando, La Union itattay ala-1:30 ti parbangon.
Nabigbig dagiti naaresto nga isuda Ryan, 32; Arjhay, 21; ken Ernesto Laconsay, 42, agpapada a residente iti Barangay Sevilla, syudad ti San Fernando.
Naammuan ti Bombo Radyo manipud ti San Fernando City Police, maipagarup nga imparada dagiti tallo ti motorsikloda iti batog ti Jeriel Sky Resto Bar ngem nagturong dagitoy iti sabali a balay pagraragsakan.
Maipagarup nga iyur-urnos ti makinkua iti nadakamat a resto bar a ni Racquel Lubrin, 44, kaddua ni misterna iti motorsiklo dagiti nasao a lallaki gapu ta saan a nasimpa ti pannakaiparada daytoy.
Nakarurod dagiti tallo kasaruno iti panangatakarda kenni Raquel ken ti anakna a ni Joseph.
Idi a simmangpet dagiti nagresponde a pulis ket saan a nagpaanwa dagiti lallaki isu a naaresto dagitoy.
Kabayatanna, naduktalan babaen ti alcoholic breath test nga adda iti impluensya ti arak dagiti tallo idi a napasamak ti riribok.
