LA UNION – Nagsagaba ti sugat iti nadumaduma nga parte ti bagida ti tallo nga tattao iti napasamaka a karabola ti lima nga lugan iti paset ti Naguilian Raod iti kabantyan ti Barangay Old Poblacion iti ili ti Burgos, La Union agarop alas-8:00 idi rabii.
Naamuan ti Bombo Radyo manipud iti Burgos Police Station, kaaduan kadagiti karaman iti aksidente ket naggapu iti syudad ti Baguio ken agpababa kuman iti probinsya ti La Union.
Nagsasaruno a nagpasalog iti kalsada ti dua a van, maysa a sports utility vehicle (SUV), maysa a wagon, ken maysa a bus idi nagsardeng dagitoy iti masungad iti maar-aramid a rangtay idi pimmalya ti preno ti maysa pay a sumarsaruno a pampasahero nga bus isu a napasamak ti aksidente.
Gapu iti panangdungpar ti maudi a bus ket naiduron dagiti nasao a lugan ken natinnag iti dirraas ti SUV.
Iti nasao nga aksidente, nasugatan dagiti driver ti maysa a kotse ken SUV, kabilang ti maysa a pasahero ti dimmungpar a bus.
Dagus a naiturong iti kaasetgan nga ospital dagiti nasugatan tapno mataming.
Nagasat ti dadduma nga pasahero ken drivers dagiti lugan gaputa saanda a nasugatan.
Agtultuloy pay ti imbestigasyon ti pulisya tapno maamuan dagiti mabalin a pagsungbatan ti driver ti nasao a pampasahero nga bus.
