LA UNION – Tallo a tattao iti nagsagaba ti serious physical injuries kalpasan a nagdinnungpar iti nagluganan dagitoy a dua a motorsiklo, iti kawatiwatan ti national highway, a sakop ti Barangay Acao, Bauang, La Union.
Dagiti biktima ket isuda: Alejo Aromin, 45, addaan asawa, nagmaneho iti motorsiklo (PN 4643-GW); iti backride na a managan Nalyn Caasi, 49, addaan asawa, agpada a residente iti nasao a lugar; ken iti managan Jessie Lozodo, 49, addaan asawa, self-employed, residente ti Barangay Baraoas, Naguilian, La Union a nagmaneho iti motorsiklo (PN 23657 AC).
Base iti report, agpada nga agturong iti daya a direksiyon dagiti dua a motorsiklo, umun-una ni Aromin idi kellaat a nag-U turn daytoy nga agpa-laud manipud daya, rason iti panagdinnungpar da iti sumarsaruno a motorsiklo a minaneho ni Lozodo.
Gaputi kapigsa iti impact ti aksidente, pada-pada dagiti tallo a nagsagaba ti nakaru a pannakadun-dunor iti bagi.
Iti agdama ket agtultuloy a matamtaming ken maob-obserbaran dagiti biktima iti nakaiturongan dagitoy nga ospital, iti Ilocos Training and Regional Medical Center (ITRMC) ditoy syudad ti San Fernando.
