SAN JUAN, La Union – Pimmusay iti tallo, kabayatan a tallo pay ti nasugatan a bin-ig a nakalugan iti maysa nga ambulansya a dimmungpar iti kasinnabat a truck iti kawatiwatan ti national highway idiay Barangay Ili Norte, ili ti San Juan, La Union itattay bigat.
Nabigbig dagiti natay nga isuda Cecila Hufano, 54, residente ti Viente Reales, Manila; Samuel Hufano, 59, residente ti Barangay Pao Norte, San Fernando City, La Union; ken Jessie Acorda, 49, residente iti syudad ti Valenzuela.
Update: Napartak ti ambulansya ken posible a nakaridep ti driver isu a naaksidente – Sa Juan Police
Base iti inisyal nga imbestigasyon ti San Juan Police, maipagarup a naggapu manipud iti maysa nga ospital idiay Batac, Ilocos Norte ti ambulansya a manmanihuen ti 62-anyos a ni Paulino delos Santos, tapno itulod koma ti maysa a pasyente nga agturong idiay Valenzuela iti a dimmungpar daytoy iti kasinnabat a truck nga iggem ni Sebastian Torretio, 51, ti Urdaneta City, Pangasinan.
Maipagarup nga imagaw iti linya ti truck ti nadakamat nga ambulansya isu a napasamak ti aksidente.
Nakaro a nakuppit iti sanguanan ti ambulansya gapu iti kinapigsa ti panagdinnungpar
Naiturong iti ospital dagiti innem a nakalugan ti ambulansya, ngem tallo kadagitoy iti natay gapu iti nakaro a dunor a napasaran iti bagida.
Agtultuloy a matamtaming idiay ospital da delos Santos; Descyrie Hufana, 15, ng Viente Reales, Manila; ken ti maysa a saan pay a nabigbig a babai.
Nagasat met ti Torretio ken ti helper daytoy a nakalugan iti truck gapu ta saanda a nadunor iti napasamak a trahedya.
Isagsagana metten ti pulisya iti kaso kontra ti nadakamat a truck driver.
