ARINGAY, La Union – Idataganen iti pulisya ti kaso ti bus driver a karaman iti napasamak nga aksidente a nakatayan iti tallo a nakalugan ti traysikel iti kawatiwatan ti national highway idiay Barangay San Eugenio, ili ti Aringay, La Union.
Naammuan ti Bombo Radyo manipud ti Aringay Police, kaso a reckless imprudence resulting in multiple homicide ti reklamo a sangnguen idiay piskalya ti responde driver ti Partas Transportation Co., Inc. a ni Eric Orbosis, 26, residente ti Barangay Santa Lina, ili ti Luna, Apayao.
Base iti imbestigasyon ti pulisya, maipagarup a sarsarunnuen iti bus ti traysikel a manmanihuen ni Gaymard Reboado, 24, residente ti Barangay San Julian East, Agoo agarup alas-3:30 itattay parbangon.
Maipagarup a napaay a liklikan ni Orbosis ti sarsarunnuenna a lugan ni Reboado gapu iti killaat a panagsikko daytoy isu a napasamak ti aksidente.
Gapu iti kinapigsa ti panagdungpar, nakuppit ti dakkel a paset ti traysikel ken iti sanguanan ti bus.
Inturong met ti rescue team iti kaaseggan nga ospital dagiti nasugatan a nakalugan ti trasysikel ngem naideklarada a dead on arrival.
Karaman kadagiti pimmusay a kaddua ni Reboado ket iti pasaherona nga agpada a security guard nga isuda Romalyn Mercado, 20; ken Ramil Parrocha, 26, a bin-ig a residente ti Barangay Alaska, Aringay.
Awan met iti nadunor kadagiti pasahero ti nadakamat a bus.
