LA UNION – Nagsasaruno a natiliw iti nagduduma a lugar iti probinsia ti La Union dagiti tallo a suspek a nagtitinnulong tapno matay ti maysa a mannalon idiay ili ti Caba idi pay bulan ti Marso ita a tawen.
Dagiti natiliw ket nabigbig a da Alfredo de Guzman, s29-anyos, a nakemmeg idiay ili ti Sto. Tomas; ni Christopher Ducusin, 29-anyos, security guard a natiliw iti siudad ti San Fernando; ken ni Patrick Ducusin, 22-anyos, natiliw idiay San Jose, Caba.
Maipalagip a pimmusay ni Roberto Dulay, 58-anyos, kalpasan a maipagarup a napukawan daytoy iti balanse iti lamisaan bayat ti panaginomda kadagiti suspek, isu a naitugtog ti ulona a rason ti pannakatay daytoy.
Nupay kasta, kinuna ni PSI Melanie Lobusta, a nakitaan iti foul play ti insidente.
Segun kenkuana, rimsua ti saan a panagkinnaawatan iti nagbaetan dagiti uppat agingga a pinagtulungan a bugbogen dagiti tallo ni Dulay.
Malaksid iti kasoda a murder ket sumangsao pay da de Guzman ken dagiti dua a Ducusin iti obstruction of justice gapu iti panagparboda iti sao tapno laeng makaliklik iti krimen.
Iti agdama ket nakabaluden dagiti suspek para iti kaskenan a disposision.
