Pinasingkedan ti pannakangiwat ti Gaza civil defense, a kontrolado ti Hamas, a pinalpaltogan ken napatay dagiti puersa ti Israel ti aganay 30 a Palestino ken nakadunoran pay dagiti 300 nga indibidwal kabayatan ti panaguray ti humanitarian aid idiay northern Gaza.
Nupay kasta, kinuna met ti biang ti Israeli Defense Forces (IDF) a nagpaputok da laeng kadagiti warning shots kalpasan a dinarop dagiti Palestino dagiti aid trucks, tallo a kilometro manipud idiay Zikim crossing ken innayon nga awan met iti natay iti insidente.
Inlawlawag pay ti Israel a ti panaguummong dagiti Palestino ket adda iti karaman a suspek a pangta met kadagiti tropa da isu a binagaan da ida nga umadayo. Kamaudian ket nagwarning shots da iti distansiya a ginasut a metro ti kaadayo na manipud iti distribution centre.
Pinaglibakan da pay a nangipatungpal da iti restriksiyon kadagiti sumsumrek nga ayuda idiay Gaza, maisupadi iti waragawag ti European Union kent United Nations.
Nupay kasta, kinuna met ti director iti al-Shifa Hospital idiay Gaza City a ni Mohammed Abu Salmiya a nakaawat ti pasilidad da kadagiti 35 nga indibidwal gapo iti insidente a kamaudian ket napasingkedan iti bilang a 48 a Palestino iti kumpirmado a pimmusay.
Maibasar iti datos manipud Hamas health ministry, dumanonen ti nasurok 60K a Palestino dagiti pimmusay iti panagraut ti Israel idiay Gaza manipud idi Oktubre 7, 2023, pakairamanan ti nasurok 18K nga ubbing ken nasurok 9K a babbai.
