LA UNION – Uppat a medical frontliners ditoy syudad ti San Fernando iti kabilang kadagiti lima a baro a kaso ti COVID 19 a nailista ditoy probinsiya ti La Union idi kalman, Nobyembre 2.
Base iti report a nagtaud mismo iti lokal a gobyerno ken panang-kumpirma ti Department of Health Center for Health Development Region I, dagiti uppat a baro a kaso ket manipud syudad ti San Fernando ken maysa manipud ili ti Bauang.
Tallo kadagiti medical workers a nagpositibo iti COVID 19 ket manipud ditoy syudad.
Dagitoy ket pakaibilangan da Patient #215 (29-anyos, babae, residente ti Purok 6 Brgy. Sevilla );
Patient #216 (27 anyos, babae, residente ti Purok 7 Brgy. Santiago Norte); ken
Patient#217 (31-anyos, lalaki, residente ti Purok 6 Barangay San Agustin); agpapada nga asymptomatic, ken awan exposure na iti siasinuman a positive patient, ken naka-admit dagitoy iti Ilocos Training and Regional Medical Center (ITRMC).
Iti maikapat a kaso ditoy syudad ket ni Patient #218, 77-anyos a lakay, residente ti Barangay Sevilla, symptomatic, ngem awan ti exposure na iti COVID 19 patient, naka-admit iti ITRMC.
Kabayatanna, kinumpirma ni Mayor Menchie de Guzman a kailyan da iti maikalima a kaso ti COVID 19 a nailista idi kalman, Nobyembre 2.
Daytoy ket maysa met laeng a medical worker iti maysa nga ospital, 34-anyos, residente ti Parian Oeste, asymptomatic, ken matamtaming iti ITRMC.
Mainaig ti daytoy, dagus a nagtignay iti contact tracing team tapno maamwan dagiti tattao a nakapolapol dagiti covid patients ken malapdan iti lalo pay a panagwaras iti sakit.
Dagus met a naipatungpal ti localized lockdown, partikular iti family compound ti pasyente idiay Bauang, La Union
Iti agdama, 48 dagiti active cases idinto a pakabuklan metten a 477 dagiti confirmed COVID infections ditoy probinsiya.
