LA UNION – Uppat a pamilya a buklen iti 17 nga indibiduwal iti nakaawid ditoy probinsiya ti La Union manipud Metro Manila.
Dagitoy ket tubo iti ili nga Aringay, Naguilian, ken Sudipen, La Union.
Dagiti nasao nga indibiduwal ket tinulongan ti gobyerno, babaen ti Department of Social Welfare and Development (DSWD), iti sidong ti programa a “Balik Probinsya, Bagong Pag-asa”.
Dagiti nasao a benipisyaryo iti BP2 program ket dagiti makunkuna a nakaru a naapektaran iti timpuar a pandemya ti COVID-19.
Tunggal pamilya ket naipaayan ti family food pack a naggapo iti provincial government bayat a ti gastos iti transportasyon ket imbaklay ti DSWD Region-1.
Dua a pamilya ditoy ket naipaayan ti housing unit idiay ili ti Aringay gaputa awan ti subliyanan da a balay kalpasan a nagturong dagitoy idiay Metro Manila.
