BR LA UNION – Pattien ti maysa a legal strategist nga agtalinaed nga impartial dagiti uppat a retirado a huwes ti Korte Suprema a pinili ti Senate Impeachment Court nga agserbi a legal advisers mainaig iti voting threshold para iti impeachment trial ni Bise Presidente Sara Duterte.
Iti pannakiuman ti Bombo Radyo Iloilo kenni Atty. Dan Cartagena, rinaem na iti pannakapili dagiti uppat a retirado a hues, agsipudta maipagarop nga awan ti ammo na a gundaway a nangipeksa dagitoy ti bukodda a political opinion.
Karaman kadagiti dinayaw ken binigbig ni Cartagena kas respetado a personalidad iti benneg ti linteg ket isuda retired Chief Justices Artemio Panganiban, Reynato Puno, ken Hilario Davide Jr., kasta met ni Retired Associate Justice Rodolfo Azcuna.
Inlawlawag ni Cartagena a nupay napaliiwna ti political leaning kenni Davide, nakasentro laeng daytoy iti lokal a politika ken saan a makiram-raman iti susik iti nagbaetan ti pamilya Marcos ken Duterte.
Dinakamat na pay ni Azcuna, nga iti laksid ti masansan a panagpa-interbiyu na, kanayon met nga ilanad na ti agsumbangir a benneg iti maysa nga isyu, a nalawag a mangipakita a dagiti opinyon na ket awanan ti panangidumduma.
Ti Senate Impeachment Court ket siguden nga impasiguradona a ti proseso ti panagpili kadagiti uppat a retirado a hues ti Korte Suprema nga agserbi a kas amici curiae—wenno “gayyem ti korte”—ket saan a mangidumduma ken patas.
Kabayatanna, impaganetget pay ni Cartagena a masapul a tungpalen ti impeachment court ti probisyon iti konstitusyon a kasapolan ti botos a two-thirds kadagiti amin a kameng ti Senado tapno makumbiktar ti maysa nga opisyal.
