LA UNION – Uppat a firecracker related incidents iti nailista ti La Union Police Provincial Office (LUPPO) manipud kadagiti naduma-duma nga ili ditoy probinsya ti La Union kabayatan iti panangsarabo ti Baro a Tawen.
Base iti report manipud ti LUPPO, maysa a 13-anyos a babae a taga Barangay Bet-ang, Balaoan ti naiturong iti pagagasan kalpasan a nagsagaba iti minor injury ti sakana gapu iti naglibang a kwitis.
Naglak-am met iti superficial burn wenno pannakasinit iti dua nga ima ti maysa a 38-anyos a mister, gapu iti nasindian a kwitis idiay Barangay Sagayad, Siudad ti San Fernando.
Nagsagaba iti second degree burn ti mata iti maysa nga 11-anyos nga ubing a lalaki kalpasan a mapungtaan daytoy iti watusi idiay Barangay Poblacion, ili ti Aringay.
Idiay Barangay Sta. Fe, ili ti Agoo, nasinit met iti makin-kannawan nga ima ti maysa nga 11-anyos nga ubing a lalaki kalpasan a sinindianna dagiti inurnongna a polbura iti paputok.
Kabayatanna, agpapada a nakarruar manipud iti nakaituronganda nga ospital dagiti nadakamat nga indibidual kalpasan a mataming dagiti nilak-amda a dunor gapu iti paputok.
