LA UNION – Inlawlawag ni Municipal Mayor Menchie de Guzman a kasapulan ti panangpawayway iti pannakaipasidong ti modified enhanced community quarantine (MECQ) iti sibubukel nga ili ti Bauang, La Union tapno mas lalo pay a mapababa iti bilang ti baro a COVID-19 cases.
Sigun kenni de Guzman, napagnunummuan iti municipal IATF ti nasao nga extension iti MECQ gapu ta nadlawanda nga epektibo daytoy tapno malapdan a manayunan iti bilang dagiti makaptan ti nasao a sakit.
Kabayatan ti MECQ kinunana, bassit ken adda pay iti aldaw nga awan iti nai-record a baro a kaso ti COVID-19 iti nasao nga ili.
Makumikom met ti alkalde ken ti munisipyo iti panangipaay iti tulong wenno ayuda kadagiti indibidual a naakaran iti COVID-19 ken iti pamilya dagitoy.
Immapela met ni de Guzman kadagiti agindeg iti Bauang nga uppat laeng nga aldaw ti panaganus iti sidong ti MECQ nga aglippas inton Abril 30,2021 tapno masegurado a naan-anay a malapdan ti panagwaras ti COVID-19.
