LA UNION – Nakailista iti lokal a gobyerno ti San Fernando City iti lima a baro a kaso ti COVID 19 ita nga aldaw ti Domingo, Setyembre 20, 2020.
Manipud iti nasao a bilang, uppat kadagitoy iti makunkuna a close contact dagiti COVID-19 patients iti Police Regional Office (PRO-1).
Da Patients #157, #158, #159, ken #160, agtawen ti 24 agingga 27 ket tubo ti Pangasinan ken maysa iti native idiay Amulong, Cagayan.
Tallo kadakuada iti asymptomatic, maysa ti symptomatic, ken agpapada dagitoy a nakaipasidong ita iti isolation facility.
Kabayatanna, iti maika-5 a kaso a ni Patient #161, 50-anyos a babae ti Barangay Parian, asymptomatic, ken maipagarop nga awan ti exposure na iti siasinuman a COVID patient, ket nakaipasidong metten iti isolation facility.
Base pay iti impormasyon manipud City Gov’t. of San Fernando, iti sibubukel a residential compound ni Patient# 161 ket maipasidong iti Heightened Community Quarantine (HCQ) iti uneg ti 72 nga oras wenno kaibatugan ti tallo nga aldaw.
Agtaltalinaed met a naka-lockdown iti PRO-1 compound kas paset pay laeng iti addang a malapdan iti panagwaras ti makaakar a sakit a COVID-19.
Idi Sabado, Setyembre 19, adda iti siyam (9) a recovered patients a nailista ditoy syudad a pakaibilangan dagiti pito (7) manipud Barangay Parian, maysa iti Barangay Lingsat ken maysa iti Barangay Sevilla.
