LA UNION – Agpapada a naitaray iti Ilocos Training and Regional Medical Center (ITRMC) dagiti uppat a tattao kalpasan a nasugatanda iti panagdinnungpar ti truck ken kotse idiay Brgy. Dili, Bauang, La Union.
Nabigbig dagiti nadundunor a da San Juan, La Union ABC President Dionisio Velasco, 63-anyos ken dagiti nakalugan iti truck a da Patrick Reyes, 33, Joseph Mangioang ken Alberto Alpad.
Maibasar iti imbestigasion ti Bauang Police Station, naamuan nga agturong koma iti abagatan a direksion ti kotse idi maipagarup a nakatuglep ni Velasco isu nga ummagaw daytoy iti bangir a linya.
Saan metten daytoy a napakadaan ni Reyes isu a naudin ti amin idi naidungpar iti sanguanan ti truck ti nakasinnabatda a lugan.
Agtultuloy pay laeng ita nga im-imbestigaran dagiti otoridad ti insidente.
