LA UNION – Uppat nga lugar idiay ili ti Balaoan ti maibilbilang a critical gapu iti nainget a political rivaly dagiti agkakalaban nga kandidato iti lokal a posisyon.
Kinuna iti Bombo Radyo La Union ni Pol. Major Juanito Buaron Jr. agdama a hepe ti Balaoan Police, dagiti lugar nga maibilang a critical ket ti San Nicolas Academy (SNA) idiay Barangay Camilo Osias, Balaoan La Union no sadino nga agbotos ti agkabsat a Mayor Aleli Concepcion ken Vice Mayoralty bet Carlo Concepcion.
Ti nasao nga pagadalan ket adda pakasaritaan ti bombing incident idi 2010 elections.
Ma-ikadua a critical nga lugar, ti Castor Z. Concepcion Memorial National High School idiay Barangay Antonino, no sadino a napaltogan iti konsehal ti ili a ni Rogelio Concepcion idi napan nga lawas; ma-ikatlo ti Balaoan National High School idiay met laeng Barangay Antonino no sadino nga agbotos da Retired Gen. Pedro Obaldo nga agkandidato a mayor ken runningmate na a ni Joaquin Ostrea kas bise mayor; ken ma-ikapat iti Barangay Pagleddegan, iti nadakamat nga ili.
Kinuna ni Buaron, dagiti nadakamat a lugar ket nainget a banbantayan ken muntaran ti ad-adu a bilang dagiti pulis, suldado ken dadduma pay nga force multipliers, tapno bantayan ti seguridad dagiti botante ken dagiti agserbi inton eleksyon.
