LA UNION – Target ita dagiti pambato a taekwondo student-athletes ti Ilocos Region iti medalya a balitok, iti panagtultuloy ti kompetisyon ita nga aldaw, idiay Peoples Coliseum idiay Sto. Domingo, Ilocos Sur.
Iti pannakiuman ti Bombo Radyo La Union kenni Coach George Philip Amano, siento porsiento iti namnama da a makagun-od ti gold medal dagiti nabatbati nga uppat a taekwondo players ti Region 1 a makibalubal kadagiti karibal nga atleta.
Kinuna na a sumabak ita nga aldaw iti ay-ayam dagiti pambato ti Division of Ilocos Sur, Division of La Union (a ni Antolin Villanueva ti Rosario, La Union) ken Division of Pangasinan.
Immunan a nakagun-od ti silver ken dua a bronze medals iti taekwondo team ti Ilocos Region iti napalabas a dua nga aldaw a kompetisyon.
Segun pay kenni coach Amano, napangabakan ni James Oranza ti Division of Pangasinan iti silver medal para iti secondary boys individual poomsae event bayat a bronze iti nangabakan ni Cesar Santos ti Naguneg, Narvacan, Ilocos Sur para iti elementary boys poomsae event.
Innayon pay ni Amano a posible nga agleppas ita nga aldaw dagiti ay-ayam iti naduma-duma a kategorya ti taekwondo ngem agtalinaed dagiti players idiay Ilocos Sur, kas panang-respeto iti dadduma pay nga atleta nga adda pay laban na, ken kas host iti agdama a Palarong Pambansa 2018.
