LA UNION – Nakaipasidong iti lockdown dagiti uppat a purok manipud iti tallo a barangay idiay Rosario, La Union gaputi panagpositibo iti COVID 19 dagiti dua nga indibiduwal.
Daytoy ket iti tarigagay a maipatungpal a dagus ti contact tracing ken masiguro iti kinatalged dagiti tattao a nakapolapol dagiti dua nga indibiduwal.
Nangrugi ti pannakaipatungpal iti Enhanced Community Quarantine (ECQ) idi rabii ti Enero uno, kadagiti dua a residential compound iti Purok 6, Barangay Gumot-Nagcolaran; maysa a residential compound iti tunggal Purok 1, Purok 2, Purok 3 ken Purok 4 ti Barangay Parasapas ken maysa a residential compound iti Purok 4, idiay Barangay Marcos, Rosario, La Union.
Maiyannurot daytoy iti Executive Order No. 01, Series of 2021 nga impaulog ni Mayor Bellarmin Flores.
Idi Enero 1, kinumpirma iti Rural Health Unit kenni Mayor Flores, a dua nga umili manipud iti nasurok 300 nga indibiduwal a naipasidong iti rapid antigen test ken RT-PCR test, iti nagpositibo iti COVID 19.
Dagitoy ket isuda RP40, 31 anyos a lalaki, residente ti Barangay Gumot-Nagcolaran, naggapo idiay Baguio City ken RP41, maysa a 22 anyos a lalaki, residente ti Purok 1, Parasapas, Rosario ken naggapo met idiay Itogon, Benguet.
Kas maiyannurot iti guidlines iti total lockdwon, amin a residente ken saan a residente ket saan a makaruar ken makastrek kadagiti nadakamat a lugar, amin a close contacts dagiti dua a pasyente ket maipasidong iti mandatory swab test ken 14-aldaw a quarantine.
Iti ili a Rosario iti agdama ket addaan ti 15 active cases ken umabot metten ti 41 dagiti confirmed COVID 19 cases.
