Umabot itan ti agarup 4,000 a hograisers nga apektado iti ASF ti nabayadanen ti DA Region 1 ditoy Ilocos Region babaen iti agtultuloy a panangipaay ti nakadamat nga ahensiya ti indemnification fund. Base iti datos ti DA Region 1, manipud iti 6, 962 a pakabuklan a bilang dagiti apektado a hograisers ditoy rehiyon, dumanon ita ti 3,949 a hograisers ti nabayadanen.
Agbalor ti P135, 160, 000 pesos ti pakabuklan a balor itattan ti naipaay ti DA Region 1 kadagiti nadakamat a bilang dagiti nabayadanen a hograisers a buklen ti 27, 032 heads iti baboy a naipasidong idi ti culling operation.
Ditoy La Union, adda itattan 2, 147 hograisers nga apektado iti ASF ti nabayadanen ti DA Region 1, agbalor ti P13, 883, 000 ti pakabuklan a pondo a naipaay kadakwada.
Iti pannakiuman ti Bombo Radyo La Union kenni DA Region 1 Communication Officer Vida Cacal, 62% itan iti pakabuklan a hograisers ditoy rehiyon ti nabayadanen.
Maururay laeng kinunana iti agdama ti pannakavalidate dagiti dadduma a recipients babaen iti Bureau of Animal Industry sakbay daytoy a maipaay kadagiti nabatbati pay a hograisers a saan pay a nakaawat ti indemnification.
Innayon na pay nga adda ti inrequest da pay a kanayonan a pondo para kadagiti nabatbati pay nga apektado a hograiser ditoy Rehiyon.
Agbalor ti P5,000 pesos per head iti baboy ti bayadan ti DA Region 1.
Maipalagip a dumanon itan ti 69 nga ili ditoy Ilocos region ti naapektaran ti ASF no sadinno 14 nga ili ditoy la union ti naapektaran.
Segun pay kenni Cacal ket improving met tattan ti sitwasyon maipanggep iti asf ken kasta pay a tuloy tuloy itattan ti maisaysayangkat a programa ti DA maipanggep iti recovery program kadagiti naapektaran.
