LA UNION – Umabuten iti agarup 40,000 katao wenno 9,000 pamilya dagiti immakar kadagiti natalged a lugar gapu ti agtultuloy a panagbayakabak iti tudo kadagiti probinsya idiay Ilocos Region.
Iti pannakiuman ti Bombo Radyo kay Office of Civil Defense Regional Center-1 spokesperson Mike Sabado, iti nadakamat a bilang dagiti naapektaran nga umili ken temporaryo nga agnanaed kadagiti evacuation centers ken adda met iti nakidagus iti babbalay dagiti kakabagyanda.
Mabalin a manayunan pay iti bilang dagiti immakar gapu ta agtultuloy ti pre-emptive evacuation kadagiti naduma-duma nga ili nga apektado ti nepnep.
Impanamnama met ti opisyal a nakasagana dagiti evacuation centers para iti kangrunaan a kasapulan dagiti immakar.
