LA UNION – Agtaltalinaed nga apektado ti African Swine Fever (ASF) dagiti 48 a probinsya iti intero a Pilipinas, maibasar iti kauddian a report ti Bureau of Animal Industry (BAI).
Segun iti National ASF Prevention and Control Program, apektado ti ASF dagiti tallo a probinsya iti Ilocos; lima idiay CAR; uppat idiay Region 2; innem iti Central Luzon; uppat idiay Calabarzon; ken tallo idiay Mimaropa.
Lima a probinsya idiay Bicol Region iti agtaltalinaed nga apektado ti African Swine Fever; lima idiay Western Visayas; tallo idiay Central Visayas; uppat idiay Eastern Visayas; sagdu-dua idiay Zamboanga peninsula ken Northern Mindanao; lima idiay Davao; dua idiay Soccsksargen ken lima idiay Caraga.
Kadagiti nasao a lugar nga apektado ti African Swine Fever, imbaga ti Bureau of Animal Industry nga adda 453 a siyudad ken ili iti naka-kategorya ti pink area wenno buffer zone.
Umabot met ti 99 a munisipalidad iti naideklara kas yellow area wenno surveillance zones ken agtultuloy a banbantayan dagiti otoridad.
Impasiguro ti Bureau of Animal Industry nga agtultuloy iti ipak-pakat da nga addang tapno mabantayan dagiti lugar iti intero a pagilian a natalged iti African Swine Fever ken mapag-talinaed a saan nga apektado ti sakit dagiti baboy.
Immunan a nagpirma iti Dept. of Agriculture ken Department of Health(DOH) iti maysa a memorandum of agreement (MOA) tapno tulungan ti Bureau of Animal Industry iti Food and Drugs Administration(FDA) a ma-determina dagiti bakuna ken agas a makatulong kadagiti taraken nga ayup ditoy pagilian a pakairamanan dagiti baboy.
