BR LA UNION – Kinumpirma ni House Secretary General Reginald Velasco a namnamaenda ti maikapat nga impeachment complaint kontra kenni Bise Presidente Sara Duterte.
Iti mensahe ni Velasco, kinuna na nga adda dagiti kameng ti Kamara a nagkiddaw iti extension gaputa ad-adalen da ti mangipila iti sabali a reklamo.
Segun iti House Secretary General, agarup 10 agingga iti 12 a kameng ti House of Representatives manipud iti majority ken minority blocs ti nagkuna a planoda ti mangipila iti maikapat nga impeachment complaint.
Nagkedked ni Velasco a naganan dagiti nadakamat a kongresista.
Kinuna ni Velasco a no maipila ti maikapat nga impeachment complaint inton Lunes, Enero 7, 2025 ket iturongna ken ni Speaker Martin Romualdez wenno itantan na.
Innayon ni Velasco nga iturongna ti maikapat a reklamo iti Legal Department ti Kamara para iti panagadalda.
Agingga ita adda tallo nga impeachment complaints a naipila iti Chamber kontra kenni VP Sara.
