LA UNION – Lima a miyembro ti maysa a pamilya idiay Barangay Santiago, Bauang, La Union iti nasabidongan iti linuto da nga u-ong.
Daytoy iti kinumpirma kabayatan ti pannakiuman ti Bombo Radyo La Union kenni Barangay Kapitan Clarito Tangalin.
Segun kenni Tangalin, naala dagiti u-ong asideg iti arubayan ti pamilya, a nagtubo iti sirok ti kakawayanan.
Inlaok da ti u-ong iti niluto da a mongo wenno balatong .
Ngem kalpasan ti sumagmamano a minuto kalpasan ti pannangan dagitoy, nakarikna iti panagulaw ken panagbakwar dagiti uppat a miyembro ti pamilya.
Nasabidongan met iti maika-5 a miyembro ti pamilya a maysa a teacher kalpasan a kinnan na iti nabati, idi simmangpet daytoy manipud iti trabaho agarop alas 4:00 ti malem ken saan a dagus a naipaka-ammo kenkuana iti napasamak.
Inlawlawag ni Tangalin, a saan a naibelleng iti inluto da a balatong a nalaokan ti makasabidong nga u-ong, gaputa saan da a pagarupen a daytoy ti nakaigapwan ti pannakaulaw ken panagbakwar dagitoy.
Nagbalin a nakaru iti kondisyon ti teacher agsipudta adu ti naipauneg na ken naiturong iti ospital agarop alas 8:00 ti rabii, iti tulong dagiti barangay officials.
Iti agdama, addan iti natalged a kondisyon dagiti biktima ngem balakad ni Tangalin a saan a basta agala ken mangan kadagiti makita nga u-ong iti aglawlaw nangruna nu saan a pamilyar ditoy tapno maliklikan ti pannakasabidong.
