LA UNION – Lima a police trainees iti Regional Special Training Unit I (RSTU-1) iti na-disqualify iti naisayangkat a graduation rites idi bigat kalman idiay Aringay, La Union gaputi panaglabsing iti training manual partikular iti pannaka-akto dagitoy a nag-iinom idi Domingo, dua nga aldaw sakbay nga agturpos dagitoy.
Daytoy ti kinumpirma bayat iti eksklusibo a pannakiuman ti Bombo Radyo La Union kenni PLt. Col Richard Verceles, training manager iti RSTU-I.
Malaksid kadagiti lima a police trainees a saan a nagturpos, dua pay iti immun-una a naikkat gaputi dadduma pay a panaglabsing iti training manual.
Kinuna ni Verceles a 393 police trainees iti pakabuklan a bilang dagiti nag-graduar manipud iti innem a bulan a public safety basic recruit course ti PNP, a nangrugi idi Agosto 2020.
Sakbay a mai-deploy dagitoy iti naduma-duma a training centers ken police stations iti intero a Region 1 para iti innem pay a bulan a Field Training Program (FTP) ket maipasidong da nga umuna iti 14-days quarantine ken mandatory RT PCR test tapno masiguro a Covid 19 free dagitoy.
Nu maipasa dagiti police trainees iti FTP a pannakaipasidong iti patrol, traffic, and investigation training ket agbalin danton a regular a kameng ti PNP kas Corporal.
Segun kenni PLt. Col. Verceles, dua laeng a puntos iti impaganetget iti nagserbi a Guest of Honor and Speaker iti graduation ceremony idi kalman, iti kinatao ni PBGEN FELIPE NATIVIDAD, Regional Director ti PRO4-A, umuna iti panagbalin a napakumbaba iti maysa a policeman ken maikadwa, panagbalin a disiplinado.
Kinuna na a dagiti maikkat iti PNP service ket tapno saan da nga agbalin a dacdackel pay a problema iti organisasyon iti masangwanan.
Kabayatanna, inyawis ni Verceles iti panagrugi manen ti PNP recruitment ita a tawen.
Kinuna na a malaksid iti 150 a quota para iti PNP Training Service, aganay 378 iti naikeddeng a quota iti Police Regional Office-One (PRO-1).
