LA UNION – Maysa iti natay bayat a 5 lima pay a tattao dagiti nasugatan iti napasamak a self vehicular accident iti kawatiwatan ti national highway iti parte ti Brgy. Taboc, San Juan, La Union idi rabii.
Dead on arrival iti ospital ti maysa kadagiti nakalugan ti FX a nabigbig a ni Sonny Miape, tubo ti Davao ken temporaryo a nakadagus idiay Brgy. Urbiztondo ti nasao nga ili bayat a nadun-dunor iti driver ken uppat pay a nakalugan nga isuda; Rodrigo Santos, 29 anyos, driver; Allen Valdez, 21 anyos; Efraim Canapi, 25 anyos, agpapada a tubo ti Marikina City; Ronie Eslep, 24 anyos, tubo ti Misamis Occidental; ken Goldilocks Serrano, 36 anyos, babae, tubo ti Marikina City.
Iti inisyal nga imbestigasyon ti San Juan Police, naidungpar ti FX iti igid ti kalsada kalpasan a napukaw ti driver iti kontrol ti manibela.
Iti kapigsa ti pannakaidungpar ti behikulo, arigna a napitpit a kasla lata daytoy.
Nairaman pay iti insidente iti parte ti maysa a balay ngem nagasat nga awan ti nasaktan kadagiti agnanaed ditoy.
Segun iti police investigator, ag-10 a bulanen ditoy La Union dagiti biktima a nakadagus iti maysa a resort kalpasan a naabutan da lockdown ken agawid koma dagitoy idi mapasamak ti aksidente.
Iti agdama, agtultuloy a maag-agasan iti maysa nga ospital ditoy San Fernando City dagiti nasugatan.
Kabayatanna, inaklon ti driver kadagiti otoridad a nakainom daytoy ti arak ken nairidep na idi mapasamak iti aksidente.
