LA UNION – Arestado dagiti lima a lallaki a maipagarup a nagtakaw iti kalding ken panagikot iti droga babaen ti maysa a police police checkpoint idiay ili ti Bacnotan, La Union.
Nabigbig dagiti suspek nga isuda Boyet Flores, Willy Fernandez, Jose Estacio, Jonathan Osilla, ken Bernie Sabala, agpapada a residente ti ili ti Sta. Barbara, Pangasinan.
Iti report a nakalap ti Bombo Radyo manipud ti Bacnotan Police Station, nagatap dagiti pulis a mangisaysayangkat ti checkpoint kadagiti suspek gapu ta kadduada dagiti uppat a kalding nga aglulubon iti uneg ti maysa a kotse.
Awan met iti nasayaat a palawag dagiti agtatakaw a kukuada dagiti nasao a dinguen agingga a simmangpet dagiti makin-taraken kadagitoy.
Iti panagtultuloy a panagalikad dagiti pulis, naduktalan manipud iti uneg ti lugan dagiti tallo a sachet a naglaon iti maatap a shabu ken dua a kutsilyo.
Agtultuloy met iti imbestigasyon ti pulisya tapno maammuan no karaman dagiti suspek kadagiti nagsasaruno a panagpukaw kadagiti taraken a kalding kadagiti naduma-duma nga ili iti probinsya ti La Union kadagiti napalabas nga aldaw.
