LA UNION – Lima a kilometro iti kaiyarigan ti kaatiddog ti pila dagiti OFWs a nakipaset iti umuna nga aldaw ti Overseas Absentee Voting(OAV) a naisayangkat idiay Bayanihan Kennedy Town Centre idiay Hong Kong.
Daytoy iti kinuna ni Bombo International News Correspondent Emily Miranda kabayatan ti interview kenkuana ti Bombo Radyo La Union.
Segun kenni Miranda, na-excite dagiti pinoy workers nga agbotos malaksid pay a naiparna a day-off iti kaadduan kadakuada, idi Domingo, Abril 10.
Maipalagip a dinopodop dagiti overseas filipino workers idiay Hong Kong iti polling station idiay Bayanihan Kennedy Town Centre bayat iti umuna nga aldaw ti Overseas Absentee Voting, nga agtultuloy agingga iti kaaldawan ti eleksiyon ditoy Pilipinas a Mayo 9.
Ngem gapu iti kina-adu unay dagiti nagturong a botante, binalakadan iti Hong Kong Police Force dagiti dadduma nga iti sabali laengen nga aldaw nga agbotos dagitoy.
Daytoy ket gapu pay laeng iti maipatpatungpal nga anti-pandemic measures.
Kabayatanna, immapela ti Philippine Consulate idiay Hong Kong kadagiti employers, a palubosan dagiti empleyado da a Filipino nga agbotos iti weekdays, tapno bassit dagiti tattao.
