LA UNION – Kinumpirma iti Municipal Government a naipaayan ti notice of violation manipud iti Municipal Engeenering Office iti lima nga estraktura a masarakan manipud iti kontrobersyal a lote idiay Sitio Kompadas ti Barangay Santiago, ili ti Bauang, La Union.
Iti pannakiuman ti Bombo Radyo kenni Bauang Municipal Administrator Daisy Sayangda, kinunana nga adda dagiti nakita a panaglabsing ti nasao nga opisina kas iti kinadakkel ti pasdek a maibangbangon ken dagiti estraktura a naiparabaw iti seawall.
Sigun kenni Sayangda, idi pay September 2020 a naipasidong iti status quo ti nasao a disso a kaipapanan ket awan iti maaramid a panangibangon iti aniaman a pasdek ken panagilako iti daga.
Ngem idi napalabas nga aldaw a kabayatan iti naangay a taripnong ti nasao a barangay, naduktalan nga adda dagiti saan a simmurot iti status quo gapu kadagiti naimatanganda a kaibangbangon a pasdek.
Imbatad ni Sayangda, manarimaan iti panangusig ti Department of Environment and Natural Resources (DENR) Central office maipapan iti petisyon nga indatag ti land beneficiaries association ti nasao a lugar tapno mammuan iti pudno a klasipikasyon ti matagtagikua a daga no daytoy ket maibilang kas public land.
Immuna iti daytoy, sumagmamano kadagiti residente ti nasao a lugar ti nagilako iti daga kadagiti tattao manipud ti syudad iti Baguio, Benguet.
Kinuwestiyon dagiti agrekreklamo iti legalidad ti panaglakuan iti daga ken panangibangon kadagiti estraktura ti nadakamat a disso.
