LA UNION – Naipasidong iti Enhanced Community Quarantine (ECQ) wenno lockdown iti maysa a residential compound a buklen iti tallo a babbalay idiay Purok 4, Barangay Bacani, Rosario, La Union epektibo idi kalman, Mayo 17.
Maiyannurot daytoy iti Executive Order No. 52, Series of 2021 nga inyisyu ni Mayor Larry Flores idi met laeng kalman.
Gapu daytoy iti panag-positibo ti COVID 19 iti maysa nga Overseas Filipino Worker (OFW) nga agsubli koman idiay Saudi Arabia.
Base iti record, ni RP-126 ket maysa a 39-anyos a lalaki, residente ti Purok 4, Barangay Bacani, Rosario, La Union.
Kas protocol wenno requirement iti panagsubli na iti abroad, nagpaisidong iti RT-PCR test idiay Dagupan Doctors Villaflor Memorial Hospital idi May 16.
May 17, pinaka-amwan isuna ti ospital a positibo iti makaakar a sakit ngem asymptomatic iti pasyente.
Iti agdama, ni RP-126 ket naka-isolate iti Isolation Facility idiay Rosario, La Union.
Immuna ti daytoy, naipasidong met iti lockdown iti dua a residential units iti Purok 7, Barangay Rabon, Rosario, La Union epektibo idi May 16, 2021.
Gapu daytoy iti nailista a maysa a kaso ti COVID 19 idi Domingo.
Nakailanad iti Executive Order No. 51, Series of 2021 nga inyisyu ni Mayor Larry Flores idi May 16, 2021 a ni RP-125 ket maysa a 40-anyos a babai, residente ti Purok 7, Barangay Rabon, Rosario, La Union.
Base iti record ti Contact Tracing Team, nagbalin a close contact daytoy dagiti kumpirmado a COVID patients idiay Barangay Rabon, San Fabian, Pangasinan idi immatendar iti hearing iti barangay hall ti nasao nga ili.
May 11, 2021 naipasidong iti RT-PCR test iti RHU idiay San Fabian ket idi May 16, nakumpirma a positibo daytoy iti sakit.
Iti agdama, naka-isolate ti pasyente iti isolation facility idiay Rosario, La Union.
Kabayatanna, naminsan manen a kiniddaw ti local chief executive kadagiti umili a tungpalen dagiti health protocols, kas iti umno a panagsuot ti face mask ken face shield, maysa a metro a physical distancing, liklikan iti natao a lugar, ken agugas ti ima nu kasapolan, tapno maliklikan ti pannaka-akar iti COVID 19.
Iti agdama, 11 dagiti aktibo a kaso ti COVID 19 iti nasao nga ili.
