LA UNION – Limitado laeng iti 500 a bisita dagiti mapalubosan nga agturong ditoy syudad ti San Fernando ken idiay Baguio City, iti sidong ti nabukel a Summit and Sea Tourism Bubble dagiti dua a syudad.
Naisayangkat idi kalman ditoy syudad ti San Fernando iti ceremonial signing iti Summit and Sea Tourism Bubble, a dinar-ayan da Acting City Mayor Alf Ortega ken Baguio City Mayor Benjamin Magalong.
Maipalagip nga idi Mayo 10, nagpinnirma dagiti dua a local chief executives iti Memorandum of Understanding (MOU) para iti pannakabukel ti Summit and Sea Tourism Bubble.
Daytoy ket maysa nga addang tapno biagen nga in-inut iti turismo a pinatay ti pandemya a COVID 19.
Iti panagbetla dagiti dua a mayor, impasigurado da a maipatungpal ti tourism bubble a kabuybuyog met laeng dagiti kaskenan a health protocols ken guidelines iti programa, tapno saan a maikompromiso iti salun-at dagiti tattao ken malapdan iti panagwaras ti sakit a COVID 19.
Manamnama a babaen iti nasao a tourism bubble ket makatulong iti panangpaganaygay manen iti ekonomiya dagiti dua a syudad.
