BR LA UNION – Agarup 5,000 a deboto ti timmabuno iti Piesta ti Sto. Niño de Tondo idiay Tondo, Manila ita nga aldaw, maibasar iti datos ti Manila Police District (MPD).
Segun kenni MPD director Police Brigadier General Arnold Thomas Ibay, awan ti nairekord nga untoward incidents kabayatan ti pannakaselebrar ti piyesta ni Sto Niño idiay Tondo ken Pandacan, Manila a nakaangayan met ti Festival of Sto. Niño de Pandacan.
Maibasar daytoy iti panangmonitorda manipud idi Sabado, a panagrugi ti sumagmamano nga aktibidad para iti nasao a selebrasyon.
Naiprusisyon idi kalman iti gasut a replica wenno imahen ni Sto. Niño a paset ti tinawen a Lakbayaw idiay Tondo, Manila ken dinar-ayan iti adu a deboto a naggapo pay iti naduma-duma a lugar idiay Metro Manila.
Pasado alas 4:00 itay bigat a nangrugi ti prusisyon ken nalpas ti alas 6:50 ti agsapa, ken nakasubli metten ti imahe iti Sto. Niño de Tondo Archdiocesan Shrine and Parish of Santo Niño.
Kabayatanna, nagpalagip ti MPD iti publiko ken dagiti umili a makipiyesta iti lugar a saan a labsen ti ag-inom ken siguradwen a makaawid dagitoy.
