Nakailista ti Office of the Civil Defense (OCD) kadagiti 53 a lugar kadagiti walo a rehiyon ditoy pagilian a nalayus gapo paylaeng iti agraraira nga Habagat ken ti kallabes a Bagyong Crising.
Segun kenni OCD officer-in-charge Rafaelito Alejandro IV, nairekord ti panaglayus kadagiti probinsya ditoy Ilocos Region, idiay MIMAROPA, Bicol Region, Western Visayas, Central Visayas, Zamboanga Peninsula, Soccsksargen, ken Caraga.
Kinuna ti opisyal nga agingga aldaw ti Sabado ket dumanonen ti 26 ti agtaltalinaed a nangato latta iti danum ti layos bayat a naapektaran pay dagiti aganay 57 road sections ken innem a rangtay.
Kabayatanna, pinasingkedan met ti Provincial Disaster Risk Reduction and Management Office ti Antique a nabigbigen dagiti dua a residente a mapukpukaw kalpasan nga iyanod ti layus iti pagtaengan da idiay Sitio Banglid, Barangay Bacalan.
