BR LA UNION – Umabot iti 54 a Pilipino idiay Israel ti kumidkiddaw ti repatriation iti tengnga ti agtultuloy a tensiyon idiay Middle East.
Segun kenni Philippine Ambassador to Israel Aileen Mendiola, adda iti 32 a turista ken 22 nga Overseas Filipino workers (OFWs) iti nangipeksa ti tarigagay da a makaawid ditoy Pilipinas.
Iti kangrunaan a karit ita, segun iti Ambassador, ket nu kasatnu da a maiyakar agsipudta awan ti flights a sumrek ken rumwar idiay Israel kasta met a nairikep iti dadduma a land crossing sadiay.
Ngem plano a maipangruna dagiti turista nga stranded gaputa awan ti pagtaengan da sadiay ken addan ti koordinasyon ti embahada iti Ministry of Tourism ti Israel tapno maiyakar dagitoy.
Daytoy pay iti makitkita a karit iti panangpa-awid ditoy Pilipinas ti bangkay ti natay a Pinay caregiver idiay Israel a ni Mary Ann Velasquez de Vera.
Segun kenni Ambassador Mendiola, imposible a maiyawid a dagus ti bangkay ti Pinay ngem pagsasaritaan dagiti team members nu kasatnuda nga iyawid ti bangkay a kadwa ti asawa ti Pinay caregiver idiay Israel ken ti kabsat na idiay Qatar.
Maibasar iti datos ti Department of Foreign Affairs (DFA), aganay 2.5 million Pilipino ti adda idiay Middle East, kaadwaan ket adda idiay United Arab Emirates (UAE), Saudi Arabia ken Qatar bayat nga 800 idiay Iran.
